Khumar Barabankavi
husn jab mehrban ho to kya kijiye
ishq ke maghfirat ki dua kijiye
is saliqe se un se gila kijiye
jab gila kijiye hans diya kijiye
dusron par agar tabsira kijiye
samne aaina rakh liya kijiye
aap sukh se hain tark-e-taalluq ke baad
itni jaldi na ye faisla kijiye
zindagi kat rahi hai bade chain se
aur gham hon to vo bhi ata kijiye
koi dhoka na kha jaae meri tarah
aise khul ke na sab se mila kijiye
aql o dil apni apni kahen jab ‘khumar’
aql ki suniye dil ka kaha kijiye
Leave a Reply