Hamdam Kashmiri
chhaTi hai raah se gard-e-malal mere liye
ki jhumti hai hava Daal Daal mere liye
hua hai kya karun jiina muhal mere liye
mire hi shahr se mujh ko nikal mere liye
koi bhi kaam nahin ho saka hai fursat men
ki kam paḌe hain bahut mah-o-sal mere liye
vo kaun hai jo miri aarti utarega
saja ke rakkha hai kis ne ye thaal mere liye
main phunk phunk ke chalta huun raah men us ki
qadam qadam pe bichha.e hain jaal mere liye
kahin pe ho ga.e pazhmurda phuul angan men
hua hai sabza kahin pa.emal mere liye
khula ye raaz riha.i ke ba.ad hi mujh par
banaya us ne mujhe yarghamal mere liye
mira dimagh hai ma.uf dil udaas bahut
hua hai jism bhi mera niDhal mere liye
hue hain raste masdud kyuun mire ‘hamdam’
junub mere liye tha shumal mere liye
Leave a Reply