Ea C A Faf
kya tamasha dekhiye tahsil-e-la-hasil men hai
ek duniya ka maza duniya-e-ab-o-gil men hai
dekh ye jazb-e-mohabbat ka karishma to nahin
kal jo tere dil men tha vo aaj mere dil men hai
main bhala kis se kahun kya kya kahun kaise kahun
maut se pahle hi mar jaane ki ḳhvahish dil men hai
mauj o shorish inqalab o iztirab o rust-o-ḳhez
hai maza sahil men kab jo duri-e-sahil men hai
jhank kar dil men zara ye to bata diije huzur
meri qismat ka sitara kaun si manzil men hai
mujh ko bhata hi nahin ik aankh husn-e-ka.enat
haan magar vo jo tire ruḳhsar ke ik til men hai
kar diya begana-e-gham-ha-e-duniya ishq ne
mujh ko asani yahi to apni is mushkil men hai
tera maazi haal se dast-o-gareban gir raha
main batata huun jo ‘sarvar’ tere mustaqbil men hai
Leave a Reply