Nasir Amrohvi
husn-e-janan ki qayamat hai uTha.e rakhe
shahar ke shahar ko divana bana.e rakhe
ek vo shaḳhs yahan tha to baḌi raunaq thi
kaun is shahar men ab sham.en jala.e rakhe
dil pareshan tha magar jaan tumhari ḳhatir
chehra shadab rakha baal bana.e rakhe
hijr men haal se behal hue hain ḳhud hi
kis men himmat hai ki kamre ko saja.e rakhe
dil-e-nadan ko ajab kaam diya qudrat ne
ḳhana-e-jan men sada shor macha.e rakhe
vo jo ojhal hai nigahon se magar dil men hai
gar vo chahe to miri baat bana.e rakhe
sheva-e-husn to inkar hi Thahra ‘nasir’
ishq ko chahiye ummid laga.e rakhe
Leave a Reply