Husn-E-Jaanan Ki Qayamat Hai uThae Rakhe

husn-e-jānāñ ki qayāmat hai uThā.e rakhe

shahar ke shahar ko dīvāna banā.e rakhe

ek vo shaḳhs yahāñ thā to baḌī raunaq thī

kaun is shahar meñ ab sham.eñ jalā.e rakhe

dil pareshāñ thā magar jaan tumhārī ḳhātir

chehra shādāb rakhā baal banā.e rakhe

hijr meñ haal se behāl hue haiñ ḳhud hī

kis meñ himmat hai ki kamre ko sajā.e rakhe

dil-e-nādāñ ko ajab kaam diyā qudrat ne

ḳhāna-e-jāñ meñ sadā shor machā.e rakhe

vo jo ojhal hai nigāhoñ se magar dil meñ hai

gar vo chāhe to mirī baat banā.e rakhe

sheva-e-husn to inkār hī Thahrā ‘nāsir’

ishq ko chāhiye ummīd lagā.e rakhe

Leave a Comment