mujhe vo chhoḌ kar jab se gaya hai intiha hai
rag-o-pai men faza-e-karbala hai intiha hai
mire halat hain naraz is pe kya karun main
gurezan asmanon se dua hai intiha hai
gham o alam hain ya hasraten hain zindagi men
tumhare baad baaqi kya bacha hai intiha hai
faqat tum hi nahin naraz mujh se jan-e-janan
mire andar ka insan tak ḳhafa hai intiha hai
kahin manzar asalib-e-havas ke char-su hain
kahin pe ḳhun-aluda faza hai intiha hai
ḳhamoshi toḌ de ai ḳhaliq-e-arz-o-sama ab
tiri maḳhluq ban baiThi ḳhuda hai intiha hai
ghazal jo tum pe ‘tahir’ ne likhi thi jan-e-‘tahir’
vahi to zinat-e-bam-e-baqa hai intiha hai
Leave a Reply