zarūr baam par aa.e vo be-naqāb kahīñ
nazar mujhe nahīñ aatā hai āftāb kahīñ
vahāñ pe zaḳhm haiñ mushtāq kab se bātoñ ke
zabān-e-teġh se hī dījiye javāb kahīñ
hañsī hañsī meñ to vo qatl-e-ām karte haiñ
qayāmat aa.e jo aa.e unheñ itaab kahīñ
lagā ke us ko kaleje se rakhte ai qātil
jo tere tiir kā miltā hameñ javāb kahīñ
shab-e-visāl meñ ‘safdar’ ko tum na tarsāo
uThā bhī do ruḳh-e-pur-nūr se naqāb kahīñ