zarur baam par aa.e vo be-naqab kahin
nazar mujhe nahin aata hai aftab kahin
vahan pe zaḳhm hain mushtaq kab se baton ke
zaban-e-tegh se hi dijiye javab kahin
hansi hansi men to vo qatl-e-am karte hain
qayamat aa.e jo aa.e unhen itaab kahin
laga ke us ko kaleje se rakhte ai qatil
jo tere tiir ka milta hamen javab kahin
shab-e-visal men ‘safdar’ ko tum na tarsao
uTha bhi do ruḳh-e-pur-nur se naqab kahin
Leave a Reply