Anjum Irfani
itni saari shamon men ek shaam kar lena
sog chand lamhon ka mere naam kar lena
lauT kar yaqinan main ek roz a.unga
palkon pe charaghon ka ehtimam kar lena
ik janm ka main pyasa rasta bhi hai lamba
ek qulzum-e-mai ka intizam kar lena
ham fana-nasibon ko aur kuchh nahin aata
ḳhuun sharab kar lena jism jaam kar lena
ye parind parvarda hai khuli fazaon ka
sabz baagh dikhla kar zer-e-dam kar lena
ḳhaak se hamari bhi ho kabhi guzar tera
bar-zaban-e-sham-o-gul kuchh kalam kar lena
be-takallufana aa sada-lauh logon men
rang-ashnaon men jashn-e-bam kar lena
vaqt-e-sham palkon par jhilmila uThen taare
shamil-e-dua ‘anjum’ ka bhi naam kar lena
Leave a Reply