Itni Sari Shamon Mein Ek Sham Kar Lena

itnī saarī shāmoñ meñ ek shaam kar lenā

sog chand lamhoñ kā mere naam kar lenā

lauT kar yaqīnan maiñ ek roz ā.ūñgā

palkoñ pe charāġhoñ kā ehtimām kar lenā

ik janm kā maiñ pyāsā rāsta bhī hai lambā

ek qulzum-e-mai kā intizām kar lenā

ham fanā-nasīboñ ko aur kuchh nahīñ aatā

ḳhuuñ sharāb kar lenā jism jaam kar lenā

ye parind parvārda hai khulī fazāoñ kā

sabz baaġh dikhlā kar zer-e-dām kar lenā

ḳhaak se hamārī bhī ho kabhī guzar terā

bar-zabān-e-sham-o-gul kuchh kalām kar lenā

be-takallufāna aa sāda-lauh logoñ meñ

rañg-āshnāoñ meñ jashn-e-bām kar lenā

vaqt-e-shām palkoñ par jhilmilā uTheñ taare

shāmil-e-duā ‘anjum’ kā bhī naam kar lenā

Leave a Comment