tiri koshish ham ai dil sa.i-e-la-hasil samajhte hain
sar-e-manzil tujhe begana-e-manzil samajhte hain
usul-e-zindagi jan-dada-e-qatil samajhte hain
na sar ko sar samajhte hain na dil ko dil samajhte hain
ghariq-e-bahr-e-ulfat ashna-e-qulzum-e-ma.ani
jahan par Duub kar ubhren use sahil samajhte hain
dayar-e-ishq ke sakin zamin par paanv kya rakkhen
yahan ke zarre zarre ko jab apna dil samajhte hain
karen kya un se shikva jo kisi ke dil jalane ko
farogh-e-garmi-e-hangama-e-mahfil samajhte hain
jhukana astan par sar koi mushkil nahin lekin
jabin-e-bandagi ko ham kab is qabil samajhte hain
shikasta-dil liye ye soch kar is bazm se nikla
shikayat kijiye un se jo dil ko dil samajhte hain
ye dil hazir hai bismillah vo kholen girah is ki
agar asan hall-e-uqda-e-mushkil samajhte hain
lab-e-fariyad agar kholun to kya hangama barpa ho
ḳhamoshi ko miri jab guftugu-e-dil samajhte hain
vo ḳhalvat ho ki jalvat ho tajalli ho ki tariki
jahan tum ho usi ko ham bhari mahfil samajhte hain
irada ho to dil mazbut kar ai Dubne vaale
jab aisa vaqt ho dhare ko bhi sahil samajhte hain
dam-e-aḳhir ruka hai ek aansu dida-e-tar men
isi ko hasti-e-nakam ka hasil samajhte hain
vafa ki had dikha kar jalne vaale dil ḳhuda-hafiz
tujhe bhi ik charagh-e-Kushta-e-manzil samajhte hain
miTa Daala mujhe phir bhi ye hai bedad ki hasrat
abhi fehrist-e-maujudat men shamil samajhte hain
mira tarz-e-suluk is raah ke rah-rau na samjhenge
magar jo rahbar rah-e-haq-o-batil samajhte hain
nisar-e-dost hai ye motiyon ka be-baha maala
har ik aansu ko ham TuuTa hua ik dil samajhte hain
jinhen ma.alum hai teri nigah-e-naz ka aalam
vo apne zabt ke da.avon ko ḳhud batil samajhte hain
‘aziz’ afkar-e-duniya aur mashaghil sher-goi ke
ahibba ki mohabbat hai jo is qabil samajhte hain
Leave a Reply