Madan Mohan Danish
chalte rahne ke liye dil men guman koi to ho
be-natija hi sahi par imtihan koi to ho
asmanon ke sitam sahti hain is ke bavajud
sab zaminen chahti hain asman koi to ho
mehrbanon hi se bach kar aa.e the tum dasht men
ab yahan bhi lag raha hai mehrban koi to ho
qahqahon ko yaad rakhti hi nahin duniya kabhi
is liye dukh ki bhi pyare dastan koi to ho
kar raha huun main daraḳhton se musalsal guftugu
is ghane jangal men ‘danish’ ham-zaban koi to ho
Leave a Reply