aariz jabin zulf-e-mo.ambar men aag hai
ye husn hai ki husn ke paikar men aag hai
us aftab-ru ko take chashm-e-ishtiyaq
allah ḳhair aag ke chakkar men aag hai
bikhre hain ḳhvab men koi bikhra abhi kahan
zinda huun main abhi mire shah-par men aag hai
pas-e-vafa tha is liye kashti utaar di
ma.alum tha hamen ki samundar men aag hai
hadd-e-nigah phaile ujalon ka ye guman
meri nazar hai aag ki manzar men aag hai
dil ki lagi bujha.e kahan ja ke ab junun
aansu hain aag bada-o-saghar men aag hai
jalti nigah sulagta jigar zehn-o-dil dhuan
kya kijiye ki apne muqaddar men aag hai
Leave a Reply