Fatima Hasan
zamin se rishta-e-divar-o-dar bhi rakhna hai
sanvarne ke liye apna ghar bhi rakhna hai
hava se aag se paani se muttasil rah kar
inhin se apni tabahi ka dar bhi rakhna hai
makan banate hue chhat bahut zaruri hai
bacha ke sehn men lekin shajar bhi rakhna hai
ye kya safar ke liye hijraten javaz banen
jo vapsi ka ho aisa safar bhi rakhna hai
hamari nasl sanvarti hai dekh kar ham ko
so apne-ap ko shaffaf-tar bhi rakhna hai
hava ke rukh ko badalna agar nahin mumkin
hava ki zad pe safar ka hunar bhi rakhna hai
nishan-e-rah se badh kar hain khvab manzil ke
inhen bachana hai aur raah par bhi rakhna hai
javaz kuchh bhi ho itna to sab hi jante hain
safar ke saath javaz-e-safar bhi rakhna hai
Leave a Reply