Nafas Ambalvi
yuun to ḳhud apne hi saa.e se bhi Dar jaate hain log
hadse kaise bhi hon lekin guzar jaate hain log
jab mujhe dushvariyon se ru-ba-ru hona paḌa
tab main samjha reza reza kyuun bikhar jaate hain log
sirf ghaza hi nahin chehron ki ra.ana.i ka raaz
shiddat-e-gham ki tapish se bhi nikhar jaate hain log
mas.ale aa kar lipaT jaate hain bachchon ki tarah
shaam ko jab lauT kar daftar se ghar jaate hain log
har ‘nafas’ mar mar ke jiite hain tujhe ai zindagi
aur jiine ki tamanna men hi mar jaate hain log
Leave a Reply