Hasan Kamal
sab ki bigḌi ko banane nikle
yaar ham tum bhi divane nikle
dhuul hai ret hai sahra hai yahan
ham kahan pyaas bujhane nikle
itni raunaq hai ki ji Dubta hai
shahr men ḳhaak uḌane nikle
in andheron men kiran jab DhunDi
sab ke hansne ke bahane nikle
koi to chiiz na.i mil jaati
dard bhi sadiyon purane nikle
chand ko raat men maut aa.i thi
laash ham din ko uThane nikle
umr barbad yunhi kar di ‘hasan’
ḳhvab bhi kitne suhane nikle
Leave a Reply