tajdid-e-ahd kar kisi simin badan ke saath
ya.ani luTa shabab sharab-e-kuhan ke saath
vabasta-e-bahar ho ḳhud misl-e-rang-o-bu
yuun zindagi guzar kisi gul-e-badan ke saath
haan ai mughanniya koi maddham sa raag chheḌ
ya.ani mila rabab dil-e-pur-mehan ke saath
saaqi pila sharab zakat-e-shabab de
haan phir koi mazaq dil-e-pur-mehan ke saath
dil chahta hai phir koi bahka hua sa tiir
phir khinch le kaman usi bankpan ke saath
zahid ye talḳh guftugu ye sun hazar haif
zalim guzar di kisi shirin-dahan ke saath
turfa sitam hain charḳh ki ye azma.ishen
vo bhi sharik-e-gham hain dil-e-pur-mehan ke saath
mahrum-e-iltifat nahin chheḌ hai murad
dil ko bhi laag hai nigah-e-pur-fatan ke saath
‘talib’ mujhi se puchhna ‘talib’ tu kaun hai
hans dena phir kisi ka ajab bhole-pan ke saath
Leave a Reply