ai jaan husn-e-afsar-e-ḳhuban tumhin to ho
main ik gada-e-ishq huun sultan tumhin to ho
pahunchi hai asman pe tajalli jamal ki
kahte hain log mehr-e-daraḳhshan tumhin to ho
sach sach ye kah raha hai tanasuḳh ka mas.ala
ruh-e-aziz-e-yusuf-e-kan.an tumhin to ho
aage tumhare sarv hai ghairat se pa-ba-gul
sahn-e-chaman men sarv-e-ḳhiraman tumhin to ho
har baat par bigaḌte ho rindon se shaiḳh-ji
saare jahan men ek musalman tumhin to ho
dil mera le ke tum ne khilauna bana liya
duniya men ek tiflak-e-nadan tumhin to ho
baton men sehr chaal men mahshar nigah men qahr
sabit hai in se fitna-e-dauran tumhin to ho
dil de ke tum ko kyuun na kahun maya-e-hayat
mere jigar tumhin ho miri jaan tumhin to ho
maddah hon tumhare na kis tarah haq-pasand
‘ahqar’ buton ke ek sana-ḳhvan tumhin to ho
Leave a Reply