kuchh aisa bhi to ho jaae kabhi aisa kare koi
banae khud nasheman aur phir sahra kare koi
tumhare naam ke hamrah mera naam le duniya
mira dil chahta hai phir mujhe rusva kare koi
agar tu mil nahin sakta to kuchh tadbir aisi ho
miri ankhon se tujh ko umr-bhar dekha kare koi
khirad par log nazan hain junun par fakhr hai mujh ko
junun se mere apni aql ka sauda kare koi
ye fitrat kab bhala insaniyat se mel khati hai
safina dubta ho duur se dekha kare koi
vo dil men jaguzin hai mustaqil hai jalva-farmai
bhala aise men phir kis tarah se parda kare koi
hujum-e-gham sambhalta hi nahin ai ‘shama’ ab mujh se
kabhi to kaash aisa ho mujhe tanha kare koi
Leave a Reply