ḳhushi ki aarzu ko pa ke mahrum-e-ḳhushi main ne
ḳhushi ki aarzu dil men kabhi palne na di main ne
vatan ki sar-zamin jis par luTa di zindagi main ne
vahin apne liye paa.i mohabbat ki kami main ne
jo meri jaan ke dushman the un par jaan di main ne
sikha.i yuun bhi apne dushmanon ko dosti main ne
siyasat se fasadon ka bana maskan vatan mera
jahan sadiyon diya paigham-e-sulh-o-ashti main ne
gul-afshan jo zamin thi vo zamin ab aag ugalti hai
ajab ta.abir dekhi hurriyat ke ḳhvab ki main ne
sahar kaisi sahar ka zikr bhi ik jurm Thahra hai
andheri raat ka dekha hai ye andher bhi main ne
vahan mujh ko mohazzab bhi na maana jaa.e hairat se
jahan tahzib ki buniyad rakkhi thi kabhi main ne
ye taufiq apni apni apna apna zarf hai pyare
musalsal tu ne ki bedad paiham daad di main ne
shikasta-pa.i se main apni pichhe rah gaya be-shak
magar tezi-e-raftar-e-jahan to jaan li main ne
ye ab tujh par hai to qadmon men rahne de ki Thukra de
tire qadmon men rakh di apne dil ki har ḳhushi main ne
yaqinan vaj.h-e-baḳhshish naz-e-umr-e-bandagi hota
kiya hota agar shayan-e-dar ik sajda bhi main ne
yahi kuchh kam nahin kam agahi ke is zamane men
jahan-e-sher ko baḳhsha ‘vaqar’-e-agahi main ne
Leave a Reply