sab muḳhalif jab kinare ho ga.e
ham men aur us men ishare ho ga.e
aa.e aur baiThe na kuchh shikva nahin
ye ghanimat hai ki baare ho ga.e
jab chaḌh aa.i ru-ba-ru fauj-e-junun
ham bhi sanmukh ho utare ho ga.e
hijr ne us ko jalaya is qadar
daagh siine par angare ho ga.e
jante the apne ham hosh-o-havas
yak nigah men sab tumhare ho ga.e
chashm to teghe the aage hi miyan
surma dene se do dhare ho ga.e
kaan ke moti tiri zulfon men raat
ḳhalq ki nazron men taare ho ga.e
jab hue ‘hatim’ ham us se ashna
dost bhi dushman hamare ho ga.e
Leave a Reply