na latif shaam ki justuju na hasin sahar ki talash hai
jo nazar nazar ko navaz de mujhe us nazar ki talash hai
mire ham-safar tujhe kya ḳhabar ye nazar nazar ki talash hai
miri rahbar ko hai justuju tujhe rahbar ki talash hai
jo ajal ko jaane hayat-e-nau jo hayat-e-nau ko ajal kahe
mujhe rah-guzar-e-hayat men usi ham-safar ki talash hai
na ho farq dair-o-haram jahan na ho apna apna sanam jahan
usi rahguzar ki talash thi usi rahguzar ki talash hai
jo bas ek pahli nigah men mire dil ka raaz samajh sake
mujhe ibtida-e-hayat se isi dida-var ki talash hai
mire zauq-e-dard ka hausla sar-e-bazm kahta hai barmala
vo ‘aziz’ kaif se duur hai jise charagar ki talash hai
Leave a Reply