Kishwar Naheed
surkhi badan men rang-e-vafa ki thi kuchh dinon
tasir ye bhi us ki dua ki thi kuchh dinon
dhunde se us ke naqsh ulajhte the aur bhi
halat tamam karb-o-bala ki thi kuchh dinon
kaghaz pe tha likha hua har harf-e-lab-kusha
tahrir jism-e-saut-o-sada ki thi kuchh dinon
shakhon pe konpalon ko zabanen ata huiin
ye dilbari bhi dast-e-saba ki thi kuchh dinon
dil-sozi-e-vafa ko shakebai ki ata
shaistagi ye rang-e-hina ki thi kuchh dinon
ab hai kuduraton ka khula dasht aur main
chahat tamam teri raza ki thi kuchh dinon
kaifiyat-e-nashat thi khud hi se guftugu
‘nahid’ ye rida bhi haya ki thi kuchh dinon
Leave a Reply