Sufi
tumhare hijr men kyuun zindagi na mushkil ho
tumhin jigar ho tumhin jaan ho tumhin dil ho
ajab nahin ki agar aina muqabil ho
tumhari tegh-e-ada khud tumhari qatil ho
na ikhtilaf-e-mazahib ke phir paden jhagde
hijab apni khudi ka agar na haail ho
tumhari tegh-e-ada ka fasana sunta huun
mujhe to qatl karo dekhun to kaise qatil ho
hamari aankh ke parde men tum chhupo dekho
tumhari aisi ho laila to aisa mahmil ho
ye arz roz-e-jaza ham karenge davar se
ki khun-baha main hamare havale qatil ho
isi nazar se hai nur-e-nigah madd-e-nazar
mujhe habib ka didar ta-ki hasil ho
habib kyuun na ho surat bhi achchhi sirat bhi
har ek amr men tum rashk-e-mah-e-kamil ho
ghazab ye hai ki adu ka jhuut sach thahre
ham un se haq bhi kahen to guman-e-batil ho
maza chakhaun tumhen is hansi ka rone par
khuda kare kahin tum dil se mujh pe maail ho
tumhare lab to hain jan-e-masih o ab-e-baqa
ye kya zamane men mash.hur hai ki qatil ho
tumhari diid se sairab ho nahin sakta
ki shakl-e-aina munh dekhne ke qabil ho
isi rafiq se ghaflat hai aah ai ‘afsar’
tumhare kaam se jo ek dam na ghafil ho
Leave a Reply