Kabhi Sher-O-Naghma Ban Ke Kabhi Aansuon Mein Dhal Ke

kabhi sher-o-naghma ban ke kabhi ansuon men Dhal ke

vo mujhe mile to lekin mile suraten badal ke

ye vafa ki sakht rahen ye tumhare pa-e-nazuk

na lo intiqam mujh se mire saath saath chal ke

vahi aankh be-baha hai jo gham-e-jahan men Duube

vahi jaam jaam hai jo baghair farq chhalke

na to hosh se taaruf na junun se ashnai

ye kahan pahunch gae ham tiri bazm se nikal ke

ye charagh-e-anjuman to hain bas ek shab ke mehman

tu jala vo shama ai dil jo bujhe kabhi na jal ke

koi ai ‘khumar’ un ko mire sher nazr kar de

jo mukhalifin mukhlis nahin mo’tarif ghazal ke

Leave a Comment