Charaghan

ek do hi nahin chhabbis diye

ek ik kar ke jalae main ne

ek diya naam ka azadi ke

us ne jalte hue honton se kaha

chahe jis mulk se gehun mango

haath phailane ki azadi hai

ik diya naam ka khush-hali ke

us ke jalte hi ye maalum hua

kitni bad-hali hai

pet khali hai mira jeb miri khali hai

ik diya naam ka yak-jehti ke

raushni us ki jahan tak pahunchi

qaum ko ladte jhagadte dekha

maan ke anchal men hain jitne paivand

sab ko ik saath udhadte dekha

duur se biivi ne jhalla ke kaha

tel mahnga bhi hai milta bhi nahin

kyuun diye itne jala rakkhe hain

apne ghar men na jharoka na munder

taaq sapnon ke saja rakkhe hain

aaya ghusse ka ik aisa jhonka

bujh gae saare diye

haan magar ek diya naam hai jis ka ummid

jhilmilata hi chala jaata hai

Leave a Comment