Qayyum Nazar
chaman-bandi pe hai mahshar bapa kya
khile hain gul uḌi hai ḳhaak kya kya
shahidan-e-vafa bhi ji uThenge
koi jaadu jaga ab puchhna kya
ḳhiram-e-naz mauzun hai tujhi ko
uThi aThkheliyan karti saba kya
fasad-e-in-o-an hai kis ke dam se
kahenge aur tujh se barmala kya
qayamat hai ki vo yuun bhi hain na-ḳhush
dua men bhi tha harf-e-mudda.a kya
fareb-e-agahi ne maar Daala
ḳhuda kya naḳhuda kya aur kya kya
yahi uḌta hua lamha rahega
abas hai ibtida kya intiha kya
ghubar-e-kahkashan chhaT bhi gaya to
kahin le ja.ega ye rasta kya
‘nazar’ is kaifiyat se kaun nikle
hua vo ashna na-ashna kya
Leave a Reply