Chaman-Bandi Pe Hai Mahshar Bapa Kya

chaman-bandī pe hai mahshar bapā kyā

khile haiñ gul uḌī hai ḳhaak kyā kyā

shahīdān-e-vafā bhī jī uTheñge

koī jaadū jagā ab pūchhnā kyā

ḳhirām-e-nāz mauzūñ hai tujhī ko

uThī aThkheliyāñ kartī sabā kyā

fasād-e-īñ-o-āñ hai kis ke dam se

kaheñge aur tujh se barmalā kyā

qayāmat hai ki vo yuuñ bhī haiñ nā-ḳhush

duā meñ bhī thā harf-e-mudda.ā kyā

fareb-e-āgahī ne maar Daalā

ḳhudā kyā nāḳhudā kyā aur kyā kyā

yahī uḌtā huā lamha rahegā

abas hai ibtidā kyā intihā kyā

ġhubār-e-kahkashāñ chhaT bhī gayā to

kahīñ le jā.egā ye rāsta kyā

‘nazar’ is kaifiyat se kaun nikle

huā vo āshnā nā-āshnā kyā

Leave a Comment