auron ki pyaas aur hai aur us ki pyaas aur
kahta hai har gilas pe bas ik gilas aur
ḳhud ko ka.i baras se ye samjha rahe hain ham
kaaTi hai itni umr to do-char maas aur
pahle hi kam hasin kahan tha tumhara gham
pahna diya hai us ko ghazal ka libas aur
Takra rahi hai saans miri us ki saans se
dil phir bhi de raha hai sada aur paas aur
allah us ka lahja-e-shirin ki kya kahun
vallah us pe urdu zaban ki miThas aur
bandha hai ab naqab to phir kas ke bandh le
ik ghunT pi ke ye na ho baḌh jaa.e pyaas aur
‘ghalib’ hayat hote to karte ye e’tiraf
daur-e-‘charagh’ men hai ghazal ka class aur
Leave a Reply