ehsan tira dil mira kya yaad karega
jo ḳhaak ko us ki na tu barbad karega
nai hasrat-e-gul-gasht na parvaz ki taqat
sadqe men tire kya mujhe azad karega
maujud huun hazir huun main raazi huun main ḳhush huun
sar par mire jo kuchh ki vo jallad karega
juz gham ke na hasil hua sohbat men kisu ki
is dil ko ilahi koi bhi shaad karega
sauda na gaya us ka tabibon ki dava se
to aa ke ilaaj ab koi fassad karega
jo is men bhi changa na hua to koi din men
ja ḳhana-e-zanjir ko abad karega
us ki jo kamar hove to khinche koi ‘hatim’
kya apna sar aa kar yahan bahzad karega
Leave a Reply