poet

Halqa Halqa Ghar Bana Lakht-E-Dil-E-Betab Ka

halqa halqa ghar bana lakht-e-dil-e-betab ka

zulf-e-janan men hai aalam subha-e-simab ka

sone men nazzara kar luun ru-e-alam-tab ka

khauf kya duzd-e-nigah ko hai shab-e-mahtab ka

khel bhi betab tha tifli men us betab ka

par udata tha hava par mahi-e-be-ab ka

ruk nahin sakta hai dariya dida-e-pur-ab ka

paat hai rumal mera daman-e-sailab ka

khvab men yaran-e-rafta se mulaqaten huiin

ham ne samjha khizr ghaflat ko rah-e-ahbab ka

kahte hain sab dekh kar betab mera uzv uzv

aadmi ab tak nahin dekha kahin simab ka

niind ki surat nahin dekha ba-juz dagh-e-jigar

parda meri aankh men shayad ki hai kam-khvab ka

lag gai aag atish-e-rukh se naqab-e-yar men

dekh lo jalta hai kona chadar-e-mahtab ka

majlis-e-be-shama vo hain sham-e-be-majlis huun main

gham mira ahbab ko hai mujh ko gham ahbab ka

hijr-e-janan ke alam men ham farishte ban gae

dhyan muddat se chhuta ab-o-taam-o-khvab ka

ahl-e-taslim-o-raza se sar-bulandon ki hai zeb

khushnuma zer-e-manar o qurb hai mehrab ka

jhuk ke ham ne bosa-e-abru ki jab mangi dua

halqa-e-aghosh par aalam hua mehrab ka

is qadar fariyad mahshar-khez ai bulbul na kar

dekhna takhta na ulte gulshan-e-shadab ka

mohr-e-dast-avez-e-gham hai har bashar ka dagh-e-gham

dil hai mahzar sohbat-e-gum-karda-e-ahbab ka

be-takalluf aa gaya vo mah dam-e-fikr-e-sukhan

rah gaya pas-e-adab se qafiya adab ka

parvarish taqdir karti hai mujhe bahr-e-qaza

zabh ko parvarda karna kaam hai qassab ka

nashsha-e-jurat ziyada ho gaya ai mai-kasho

saghar-e-mai ban gaya kaasa sar-e-sohrab ka

mu-e-atish-did saan bal khaae vo mu-e-kamar

main jo likkhun garm mazmun us tilai Daab ka

ho gaya huun main naqab-e-ru-e-raushan par faqir

chahiye tah-band mujh ko chadar-e-mahtab ka

khal-o-khat se aib us ke ru-e-aqdas ko nahin

husn hai mushaf men hona nuqta-e-earab ka

dost dushman se ziyada tez rakhte hain chhuri

barhaman bhi pesha ab karne lage qassab ka

hont par angusht-e-rangin rakh ke vo kahne lage

shakh-e-marjan ne samar paida kiya unnab ka

laghari ke saath betabi yahi ai bahr-e-husn

khaar hai ye jism-e-laghar mahi-e-be-ab ka

teri furqat men jo aae bhuul kar ankhon men niind

marduman-e-chashm ne phir munh na dekha khvab ka

mere murgh-e-dil ki betabi udaai kis tarah

hausla aisa nahin hai tair-e-simab ka

khidmat-e-aqdas men chal kar ye ghazal padh ai ‘munir’

shohra sab ahl-e-sukhan men hai tire navvab ka

More Poems

Leave a Comment