ab yahan koi nahin pahle yahan tha koi
jis ke dam se ye makan aur makan tha koi
da.era da.era tha jis se vo markaz na raha
jab vo tha nuqta-e-be-qibla kahan tha koi
nang-e-maidan hai jo ab zinat-e-maidan tha kabhi
ab jahan gum huun vahan pahle ravan tha koi
meri shaḳhen mire patte mujhe sab chhoḌ ga.e
jaise main ba.is-e-yalghar-e-ḳhizan tha koi
yahi saa.e the magar tez thi jab shauq ki lau
fitna-e-dil tha koi afat-e-jan tha koi
huun vo lamha ki na manoge rahunga jab tak
na rahunga to ḳhayal aa.ega haan tha koi
raaz mera na khulega ye khulega mire ba.ad
kuchh na tha jis pe muqarrar nigaran tha koi
asmanon se tu kya toḌ ke la.ega ‘muhib’
qaht kya chand ke TukḌon ka yahan tha koi
Leave a Reply