meri be-hauslagi is se siva aur sahi
aur chaho to mohabbat ka sila aur sahi
yuun bhi kuchh kam to na the itni baharon ke hujum
in men shamil tire daman ki hava aur sahi
mujh ko israr kahan hai ki mohabbat janun
aaj se ma.ani-o-andaz-o-ada aur sahi
talab-e-dard men dil had se guzarta kab tha
tum ne puchha tha ki aur is ne kaha aur sahi
ab to har shahar men us ke hi qaside paḌhiye
vo jo pahle hi ḳhafa hai vo ḳhafa aur sahi
ham isi rahmat-o-zahmat ke hain aadi yarab
jaisi bhi hai isi duniya ki faza aur sahi
sabaq-e-be-gunahi tishna-e-takmil bhi tha
ik naya falsafa-e-jurm-o-saza aur sahi
aaj aap apne mahasin ka bayan kar liije
mahfil-e-tazkira-e-ahl-e-vafa aur sahi
kya zaruri hai ki andaz-e-baharan rakkhe
ab jo kuchh aur hai raftar-e-saba aur sahi
ab bahut shor sahi kal to koi parkhega
in sadaon men faqiron ki nava aur sahi
kyuun na ‘ali’ se alaa.i pe ghazal likhva.e
ek bedadgar-e-ranj-faza aur sahi
Leave a Reply