jo mauj ḳhushbuon ki thi gulab se nikal ga.i
main muzmahil thi is qadar shabab se nikal ga.i
ye zindagi ye ruḳhsati usi ki hain amanaten
shikasta jism men tire azaab se nikal ga.i
main likh rahi thi dastan tira bhi naam aa gaya
kahani apne aap hi kitab se nikal ga.i
vo lams baḌh raha tha ab qarib se qarib-tar
so main ne faisla kiya habab se nikal ga.i
sharik dauḌ men hue safar bhi aur qayam bhi
to raḳhsh-e-vaqt main tiri rikab se nikal ga.i
saval ka javab bhi saval hi se dega tu
jhamela-saz main tire sarab se nikal ga.i
main mubtala-e-arzu thi aarzu se jaag uThi
aur agle pal hi zindagi hisab se nikal ga.i
nirash chand tirgi men ghul ke shant ho gaya
‘sahar’ main niind men chali to ḳhvab se nikal ga.i
Leave a Reply