fikr-e-sud-o-ziyan men rahta huun
main bhi is ḳhak-dan men rahta huun
nilgun asman ke niche
ḳhema-e-jism-o-jan men rahta huun
main huun azad kab zamane men
qaid-e-vahm-o-guman men rahta huun
main mohabbat ki raushni ban kar
vaqt ki kahkashan men rahta huun
main baharon ke rang men Dhal kar
manzar-e-bostan men rahta huun
jaane kya baat hai ki main tanha
mahfil-e-dostan men rahta huun
apne buḌhe vajud ke andar
ik shikasta makan men rahta huun
fikr-e-itlaf-e-zindagi kaisa
main ajal ki amaan men rahta huun
main bagulon ke darmiyan ‘shahid’
dasht-e-asr-e-ravan men rahta huun
Leave a Reply