Chaman Main Rang-E-Bahaar Utra To Maine Dekha

chaman main rang-e-bahar utra to main ne dekha

nazar se dil ka ghubar utra to main ne dekha

main nim-shab asman ki vusat ko dekhta tha

zamin pe vo husn-zar utra to main ne dekha

gali ke bahar tamam manzar badal gae the

jo saya-e-ku-e-yar utra to main ne dekha

khumar-e-mai men vo chehra kuchh aur lag raha tha

dam-e-sahar jab khumar utra to main ne dekha

ik aur dariya ka samna tha ‘munir’ mujh ko

main ek dariya ke paar utra to main ne dekha

Leave a Comment