Raz Chandpuri
miri fitrat haqiqat-ashna ma.alum hoti hai
nazar paḌti hai jis shai par ḳhuda ma.alum hoti hai
sarapa soz lekin jan-fiza ma.alum hoti hai
sada-e-saz-e-dil haq ki sada ma.alum hoti hai
bahut ḳhush-zarf-o-ḳhush-bin hai faza-e-vadi-e-ghurbat
ba-zahir hamdam-o-dard-ashna ma.alum hoti hai
ye kaisi zindagi hai ai asir-e-dam-e-ḳhush-fahmi
jafa-e-baghban bhi ab vafa ma.alum hoti hai
main us manzil men huun ab gam-farsa ai zahe-qismat
nigah-e-rahzan bhi rahnuma ma.alum hoti hai
ye rang-e-sher-goi raaz ye tarz-e-ghazal-ḳhvani
tiri fitrat haqiqat-ashna ma.alum hoti hai
Leave a Reply