Chupke Chupke Raat din Aansu Bahana Yaad Hai

Hasrat Mohani

chupke chupke raat din aansu bahana yaad hai

ham ko ab tak ashiqi ka vo zamana yaad hai

ba-hazaran iztirab o sad-hazaran ishtiyaq

tujh se vo pahle-pahal dil ka lagana yaad hai

baar baar uthna usi janib nigah-e-shauq ka

aur tira ghurfe se vo ankhen ladana yaad hai

tujh se kuchh milte hi vo bebak ho jaana mira

aur tira danton men vo ungli dabana yaad hai

khinch lena vo mira parde ka kona dafatan

aur dupatte se tira vo munh chhupana yaad hai

jaan kar sota tujhe vo qasd-e-pa-bosi mira

aur tira thukra ke sar vo muskurana yaad hai

tujh ko jab tanha kabhi paana to az-rah-e-lihaz

hal-e-dil baton hi baton men jatana yaad hai

jab siva mere tumhara koi divana na tha

sach kaho kuchh tum ko bhi vo kar-khana yaad hai

ghair ki nazron se bach kar sab ki marzi ke khilaf

vo tira chori-chhupe raton ko aana yaad hai

aa gaya gar vasl ki shab bhi kahin zikr-e-firaq

vo tira ro ro ke mujh ko bhi rulana yaad hai

dopahar ki dhuup men mere bulane ke liye

vo tira kothe pe nange paanv aana yaad hai

aaj tak nazron men hai vo sohbat-e-raz-o-niyaz

apna jaana yaad hai tera bulana yaad hai

mithi mithi chhed kar baten nirali pyaar ki

zikr dushman ka vo baton men udana yaad hai

dekhna mujh ko jo bargashta to sau sau naaz se

jab mana lena to phir khud ruuth jaana yaad hai

chori chori ham se tum aa kar mile the jis jagah

muddaten guzrin par ab tak vo thikana yaad hai

shauq men mehndi ke vo be-dast-o-pa hona tira

aur mira vo chhedna vo gudgudana yaad hai

bavajud-e-iddia-e-ittiqa ‘hasrat’ mujhe

aaj tak ahd-e-havas ka vo fasana yaad hai