Kya din The Jab Chhup Chhup Kar Tum Pas Hamare Aate The

kya din the jab chhup chhup kar tum paas hamare aate the

kanpte the badnami ke dar se aansu pi pi jaate the

haae javani kya mausam tha ab vo din yaad aate hain

ruthte the ham har-dam un pe aur vo aa ke manate the

haae ghazab hai mujh vahshi ko us mausam men qaid kiya

sun jab shor-e-fasl-e-baharan murgh-e-qafas ghabrate the

zikr kiya main aap ka kis se kis ke aage naam liya

dushman the vo log mire jo aap ke taiin bahkate the

haae vo pahle chaah ka aalam kis se main izhar karun

main to hijab se aap khajil tha vo mujh se sharmate the

us se ‘havas’ milna mushkil tha par vo ham se duur na the

un ki hi tasvir se har-dam apna ji bahlate the