idhar ye haal ki chhune ka iḳhtiyar nahin
udhar vo husn ki ankhon pe e’tibar nahin
main ab kisi ki bhi ummid toḌ sakta huun
mujhe kisi pe bhi ab koi e’tibar nahin
tum apni halat-e-ghurbat ka gham manate ho
ḳhuda ka shukr karo mujh se be-dayar nahin
main sochta huun ki vo bhi dukhi na ho jaa.e
ye dastan koi aisi ḳhush-gavar nahin
to kya yaqin dilane se maan jaoge?
yaqin dila.un ki ye hijr dil pe baar nahin
qadam qadam pe na.i Thokaren hain rahon men
dayar-e-ishq men koi bhi kamgar nahin
yahi sukun miri be-kali na ban jaa.e
ki zindagi men koi vaj.h-e-intizar nahin
ḳhuda ke baare men ik din zarur sochenge
abhi to ḳhud se ta.alluq bhi ustuvar nahin
gila to mujh se vo karta hai is tarah ‘javvad’
ki jaise main to juda.i men sogvar nahin
Leave a Reply