Chalti Phirti Diwaren

kaun hai vo

kuchh nahin jante

dekh sakte nahin

duniya ki divaron men

chune hue patthar

kaun mere khvabon men

asmanon se utarta hai

jadu-zada logon ko

divaron se nikal kar

zinda dilon ki bastiyan abad karna chahta hai

magar ye log kaise hain

ba-zid hain

dilon tak jaate raste band rakhne par

ankhon zabanon aur dimaghon ko

divaron men qaid rakhne par musir hain

men hairan huun

ki divaren bhi chalti hain

kuchalti jaati hain

ra.unat se

sabhi maasum jazbon ko

kitabon se umaDti raushni ko

dilon men nafraten bhar kar

utha kar sar ye chalte hain

ra.unat se

saja kar apne mathe par

nishan sajdon ke

sab se fakhriya kahte hain

ham hi muttaqi hain aur zahid hain

magar un ki qanaat girya-zari zohd-o-taqva

dikhava hai banavat aur sajavat hai

ye jis ke naam par dhoke bantte phirte hain

masjidon aur bazaron men

use sajdon se kya matlab

use to dil basane hain

aur is jadu-zada basti ko jannat men badalna hai

Leave a Comment