Rag Rag Mein Meri Phail Gaya Hai Ye Kaisa Zahr

Shahid Mahuli

rag rag men meri phail gaya hai ye kaisa zahr

kyuun Dubne laga hai dhundlakon men saara shahr

mujh ko jhinjhoḌ deti hain lamhon ki ahaTen

uThti hai mere jism men ik bebasi ki lahr

ye shab mire vajud pe yuun TuuT paḌti hai

jaise koi bala ho ki aaseb ho ki qahr

phuTa na muddaton se koi chashma-e-umid

sukhi paḌi hui hai miri ḳhvahishon ki nahr

chehre pe vaqt ki main siyahi mala karun

mujh ko bhi kuchh mila hai mashiyyat se kar-e-dahr