Raz Chandpuri
nigah-e-shauq vaqf-e-husn-e-fitrat hoti jaati hai
tabi.at mahram-e-raz-e-mohabbat hoti jaati hai
numayan shoḳhi-e-rang-e-tabi.at hoti jaati hai
ki har kafir ada se ab mohabbat hoti jaati hai
mohabbat aah kya shai hai mohabbat kya kahun tum se
mujhe ma.alum dil ki qadr-o-qimat hoti jaati hai
mira zauq-e-parastish hai juda saare zamane se
mohabbat karta jaata huun ibadat hoti jaati hai
main jitna ghaur karta huun nizam-e-bazm-e-hasti par
isi nisbat se zahir ab haqiqat hoti jaati hai
jafa-e-charḳh kaj-buniyad ko rahat samajhta huun
dalil-e-rah-e-irfan har musibat hoti jaati hai
qayamat hai ki arbab-e-mohabbat uThte jaate hain
nazar valon se ḳhali bazm-e-fitrat hoti jaati hai
vatan valon se koi kaash kah de ‘raz’ ye ja kar
bahar-e-zindagani nazr-e-ghurbat hoti jaati hai
Leave a Reply