Lamha Lamha Bikhar Raha Hun Main

lamha lamha bikhar rahā huuñ maiñ

apnī takmīl kar rahā huuñ maiñ

ḳhuub se ḳhūb-tar hai rū-e-hayāt

na.e siñghār kar rahā huuñ maiñ

khulte jaate haiñ zehn ke aurāq

tajraboñ se guzar rahā huuñ maiñ

terā honā na maan kar goyā

tujh ko taslīm kar rahā huuñ maiñ

ḳhud se nā-āshnā sahī lekin

tujh se kab be-ḳhabar rahā huuñ maiñ

mahv aisā huuñ ḳhud-parastī meñ

goyā tujh se mukar rahā huuñ maiñ

Leave a Comment