juda hai tera saliqa hai tera Dhang alag
lage hai saare manazir men tera rang alag
ravan tha garm lahu ahani parindon men
chhaḌi thi amn-pasandon men sard-jang alag
na.i dishaon se masmum andhiyan uTThin
to asman bhi badalne laga tha rang alag
nishat-e-fan to bahar-hal apni qismat hai
hazar apne masa.il hain un se jang alag
siyah abr huun suraj se chhin lunga ziya
karunga qaus-e-quzah ke main rang rang alag
juda hain tund havaon ke atishin naghme
to paniyon ke tarane hain zer-e-sang alag
main apni shaam ko sub.h-e-hisab kahta huun
magar vo shaam jo guzri hai tere sang alag
ghazal ke dar pe baḌa izhdiham hai lekin
‘nizam’ naam hai jis ka vo ik malang alag
Leave a Reply