Hamida Shahin
ham ghair samajhte use aisa bhi nahin ḳhair
lekin vo kisi ka nahin apna bhi nahin ḳhair
jo sochte rahte hain vo karna nahin mumkin
karne ke irade se to socha bhi nahin ḳhair
shohra hai ki rusva.i ki tasdiq hai vo shaḳhs
shohrat ka bharosa koi hota bhi nahin ḳhair
kuchh ban ke dikhane ki tamanna ka bana kya
itni si tamanna men to banta bhi nahin ḳhair
ham us ke liye apni nazar men bure Thahren
achchha hai vo achchha bha.i itna bhi nahin ḳhair
kuchh saint ke rakhne ka hamen shauq nahin tha
kuchh saint ke rakhne ke liye tha bhi nahin ḳhair
go ek aziyyat hai tira rang-e-taghaful
ye rang kisi aur pe sajta bhi nahin ḳhair
us shaḳhs pe tanha.i to utregi bala ki
jo hai bhi nahin ḳhair hai lagta bhi nahin ḳhair
sab ḳhair ho sab ḳhair ho ai majma-e-zahir
ham bhiiḌ ka hissa nahin tanha bhi nahin ḳhair
ye ḳhair faqat lafz nahin fahm-o-yaqin hai
jo ḳhair samajhta nahin hota bhi nahin ḳhair
Leave a Reply