Yazdani Jalandhari
jahan kuchh log divane bane hain
baḌe dilchasp afsane bane hain
haqiqat kuchh to hoti hai yaqinan
kahin jhuTe bhi afsane bane hain
bahut nazan the jo farzangi par
unhen dekha to divane bane hain
ki andaz-e-nazar ki azari se
dilon men kitne but-ḳhane bane hain
jo sho.ala sham.a ke dil men hai raushan
usi sho.ale se parvane bane hain
ye kis saaqi ka faizan-e-nazar hai
chaman men phuul paimane bane hain
qayamat tha mira mahfil se uThna
na jaane kitne afsane bane hain
miri divangi par hansne vaale
ba-zom-e-ḳhvesh farzane bane hain
jali hain zehn men yadon ki sham.en
tasavvur men sanam-ḳhane bane hain
ba-nam-e-gham ba-unvan-e-mohabbat
junun-afroz afsane bane hain
zamane se ho ‘yazdani’ gila kya
ki jo apne the begane bane hain
Leave a Reply