Wajid Ali Shah Akhtar
sahe gham pae raftagan kaise kaise
mire kho gae karvan kaise kaise
vo chitvan vo abru vo qad yaad sab hai
sunaun main guzre bayan kaise kaise
mire dagh-e-sozan ka mazmun na socho
jale kah ke atish-zaban kaise kaise
raha ishq se naam majnun ka varna
tah-e-khak hain be-nishan kaise kaise
shab-e-vasl men mah ko uryan karenge
ayaan honge raz-e-nihan kaise kaise
kamar yaar ki na-tavani men dhundi
tavahhum hue darmiyan kaise kaise
kaleje men ‘akhtar’ phaphole pade hain
mire uth gae qadr-dan kaise kaise
Leave a Reply