Ejaz Asif
aa gaya isar mere halqa-e-ahbab men
phir kisi sho.ale ne paa.i hai numu barfab men
kah rahi hai sahilon se Dubne vaale ki laash
main ne paaya hai sukun ik muztarib girdab men
kaanp uTTha huun varud-e-barish-e-mau.uda par
gharq hone ko hai saara shahar sail-e-ab men
mere hathon men agar taqdir-e-sub.h-o-sham ho
titliyan ta.abir ki rakh duun kitab-e-ḳhvab men
ḳhaak ke putle ne aḳhir kar diya ifsha use
dafan tha jo raaz ab tak sina-e-mahtab men
samne ki chiiz men ‘asif’ nahin koi kashish
tak na yuun hairat se apne aks ko talab men
Leave a Reply