Tariq Naeem
hava ka hukm bhi ab ke nazar men rakkha jaa.e
kisi bhi ruḳh pe daricha na ghar men rakkha jaa.e
ye ka.enat abhi tak mire tavaf men hai
ajab nahin ise yunhi safar men rakkha jaa.e
main sang-e-sada huun lekin miri ye hasrat hai
makan dost ke divar-o-dar men rakkha jaa.e
ye jal-bujhega isi zo.am-e-agahi ke sabab
diye ko aur na bab-e-ḳhabar men rakkha jaa.e
nasha uḌaan ka aise utarne vaala nahin
kuchh aur vazn mire bal-o-par men rakkha jaa.e
koi kahin na kahin ik kami si hai mujh men
mujhe dobara gul-e-kuza-gar men rakkha jaa.e
vo a.ina hai to hairat kisi jamal ki ho
jo sang hai to kahin rahguzar men rakkha jaa.e
vo chahta hai ki ‘tariq’-na.im tujh ko bhi
tamam umr usi ke asar men rakkha jaa.e
Leave a Reply