Fariyaad Nahin Ashk Nahin Aah Nahin Hai

fariyād nahīñ ashk nahīñ aah nahīñ hai

ai ishq tirā koī havā-ḳhvāh nahīñ hai

go dard-e-tamannā ko baḌhātā hai tirā zikr

dil phir bhī tire naam se āgāh nahīñ hai

ai husn-e-yaqīñ dair-o-haram kī hai fazā tañg

is dar se palaTne kī koī raah nahīñ hai

ye kis ne uḌaa.ī ki mujhe ishq hai tum se

haañ tum ko yaqīñ aa.e to afvāh nahīñ hai

āsā.ish-e-tan ruuh kā āzār hai ‘qaisar’

duniyā meñ ġham-e-ishq se tanḳhvāh nahīñ hai

Leave a Comment