kis tarah bana.en ham apna ye makan yaaro ret is nagar ki hai iinT is nagar ki hai
joḌte unhen kaise aur phir kahan yaaro ret is nagar ki hai iinT is nagar ki hai
ek hasrat-e-tamir dil men jo zara si thi Dar tha jaag uTThegi aur jaag uTThi hai
kaan khol kar sun lo tum mira bayan yaaro ret is nagar ki hai iinT is nagar ki hai
ye to jante sab hain ham bhi sochte ab hain jis nagar men rahte the us nagar men rahte hain
ek hai zamin apni ek asman yaaro ret is nagar ki hai iinT is nagar ki hai
ghar nahin agar apna ghar men ja to sakte hain dar nahin agar apna dar to khol sakte hain
aa ke kah gaya ham ko kaun darmiyan yaaro ret is nagar ki hai iinT is nagar ki hai
is muqaddame par bhi ik muqaddama hoga zor-o-shor se hoga aur aaj hi hoga
khol kar agar dekhen un ki ham dukan yaaro ret is nagar ki hai iinT is nagar ki hai
kya sabaq paḌhate hain shahr ko diyanat ka aa gaya hai jab is par faisla adalat ka
aap kyuun pakaḌte hain un ki choriyan yaaro ret is nagar ki hai iinT is nagar ki hai
roz main bikharta huun roz hi bikharta hai mere ghar ka shiraza tum karo jo andaza
kya suna gaya koi ghar ki dastan yaaro ret us nagar ki hai iinT is nagar ki hai
ghurkhiyon ke gaanv se ret uTha ke laa.e the iinT shahr se li thi ye na tha magar ma.alum
jhelna paḌengi phir ghar ki ghurkiyan yaaro ret is nagar ki hai iinT is nagar ki hai
iinT le gaya koi ret le gaya koi mujh ko zindagi-bhar ka rog de gaya koi
roz kahta phirta huun main yahan vahan yaaro ret is nagar ki hai iinT is nagar ki hai
iinT ret se ham ne ik makan banaya tha ham ne haan banaya tha par kahan banaya tha
go ki jante hain ham zer-e-asman yaaro ret is nagar ki hai iinT is nagar ki hai
nun-mim-‘rashid’ se ham ‘nabil’ puchhenge zindagi to tum bhi ho zindagi to ham bhi hain
kis tarah bana.en ham nazm ka jahan yaaro ret is nagar ki hai iinT is nagar ki hai
Leave a Reply