Naseer Turabi
main bhi ai kaash kabhi mauj-e-saba ho ja.un
is tavaqqo pe ki ḳhud se bhi juda ho ja.un
abr uTThe to simaT ja.un tiri ankhon men
dhuup nikle to tire sar ki rida ho ja.un
aaj ki raat ujale mire ham-saya hain
aaj ki raat jo so luun to naya ho ja.un
ab yahi soch liya dil men ki manzil ke baghair
ghar palaT aa.uun to main abla-pa ho ja.un
phuul ki tarah mahakta huun tiri yaad ke saath
ye alag baat ki main tujh se ḳhafa ho ja.un
jis ke kuche men baraste rahe patthar mujh par
us ke hathon ke liye rang-e-hina ho ja.un
aarzu ye hai ki taqdis-e-hunar ki ḳhatir
tere honTon pe rahun hamd-o-sana ho ja.un
marhala apni parastish ka ho darpesh to main
apne hi samne ma.il-ba-dua ho ja.un
tisha-e-vaqt bata.e ki ta.aruf ke liye
kin pahaḌon ki bulandi pe khaḌa ho ja.un
haa.e vo log ki main jin ka pujari huun ‘nasir’
haa.e vo log ki main jin ka ḳhuda ho ja.un
Leave a Reply