Azhar Ghauri
har ek samt hai ik jiit haar ka mausam
ab ek ḳhvab sa lagta hai pyaar ka mausam
isi ko gardish-e-lail-o-nahar kahte hain
kabhi ḳhizan hai kabhi hai bahar ka mausam
chaman men dhuum machi hai ki fasl-e-gul aa.i
yahi hai daman-e-sad-tar-tar ka mausam
ab us ko yaad dilane ka fa.eda hi nahin
vo bhuul bhi chuka qaul-o-qarar ka mausam
har ik shikast pe josh-e-amal men shiddat la
miTega dida-e-ḳhunaba-bar ka mausam
na aane de kabhi pa-e-sabat men laghzish
sada mila hai kise iḳhtiyar ka mausam
riha.i milti hai yaaro na jaan jaati hai
azab-e-jan hai ye intizar ka mausam
daraz kitni hi shab ho guzar hi ja.egi
palaT ke aa.ega didar-e-yar ka mausam
jo lauh-e-dil pe lagane chale ho daagh pe daagh
kabhi to aa.ega un ke shumar ka mausam
hai ab ye haal urus-ul-bilad ka ‘az.har’
Thahar gaya hai vahin gir-o-dar ka mausam
Leave a Reply